Es gibt eine deutsche Übersetzung dieser Seite.
C`è anche una traduzione italiana di questa pagina.
There is an English version of this page.

Salve

quicumque has exiguas ad ius Romanum pertinentes lectione dignaris paginas! Quae ex Corpore Iuris Civilis Iustiniani Imperatoris sumptas leges praebent nonnullas necnon commentarios quos Accursius Bononiensis dictis legibus addidit. Cum adhuc immensi operis pleraque desint, tamen pauca quae iam sunt praesto hic ostendimus exempla, utilitati alicui aut delectationi legentibus futura existimantes.

Superest, ut de finibus, quos praesenti opere appetimus, breviter dicamus. Mirum enim et inexplicabilis, nisi fallor, multis videbitur, non parvo labore nos ad ius non iam vigens pertinentia exscribere et in formam electronicam redigere.
Primo iuris Romani cum antiquitatis tum medii aevi scientiam promovere studemus. Quis ignoret Iulianum, Papinianum aliosque iuris consultos eiusdem temporis sagacitate subtilitate elegantia omnibus praestare? Quorum scripta in Iustiniani Corpore collecta a Bononiensibus reperta et retractata iuris civilis, quo populi Europae hodie utuntur, fundamenta facta sunt. Et in renascituro iure civili communi Europae dicta fundamenta communia maximum valebunt.
Secundo demonstratur his paginis non omnia quae in machinis computatricibus utendis inveniuntur esse tam inaudita ut aestimentur. Totius Terrae Textura (TTT, vulgo WWW), cui paginae nostrae inhaerent, novum modum legendi introduxisse dicitur. Non iam cogimur ordinem paginarum ab auctore statutum sequi. Singulis verbis tamquam vinculis usi a pagina ad paginam ad arbitrium proprium salimus. Quem novum legendi modum appellatione "Hypertext" vulgus designat.
Iuri Romano medii aevii operam danti similitudo inter "Hypertext" et modum, quo Accursii glossae cum legibus Coporis Iuris coniunguntur, perspicua est: Singula verba legum signantur, ut pateat ea in glossa explicari. Item glossae indicationes legum aliarum et glossarum continentur.

Auxilio omnium indigemus!

Ut perficiamus aut amplificemus saltem hanc collectionem paginarum, auxilio opus est! Multis adiuvantibus contingemus, ut magna pars vel omnes partes Corporis Iuris Iustiniani cum glossis in Interreticulo praestentur. Quisquis aditum habet ad librum continentem leges Iustiniani et glossas, potest praeparare unam vel plures leges. Lege paginam auxilium ferre volentibus deditam aut mitte mihi litteras. Si quem errorem in his paginis conspicis, aeque aut lege paginam aut mitte litteras .